Kambi
Rasmi ya Upinzani Bungeni jana ilimlipua mbunge kutoka kambi yao, Zitto
Kabwe ikimhusisha na ufisadi wa Sh119 milioni kutoka Shirika la Taifa
la Hifadhi ya Jamii (NSSF) na Shirika la Hifadhi za Taifa (Tanapa).
Maoni
hayo yalitolewa na kambi ya upinzani bungeni jana ikiwa ni mara ya
kwanza kumchana mwenzao kuhusu makadirio na matumizi ya Wizara ya
Habari, Vijana, Utamaduni na Michezo mwaka 2014/15, waziri kivuli wa
wizara hiyo, Joseph Mbilinyi alisema Zitto hakutakiwa kuchota fedha hizo
kwa kuwa anabanwa na sheria ya maadili ya viongozi wa umma.
Zitto hakukaa kimya hiki ndicho alichokijibu
Maelezo yangu kuhusu kazi za Kigoma AllStars/LEKADUTIGITE kwa NSSF na TANAPA.
Leo tarehe 29 Mei, 2014 Msemaji wa Kambi ya Upinzani kuhusu Habari,
Michezo, Vijana na Utamaduni amenituhumu kuhusika na kinachoitwa ufisadi
katika Shirika la TANAPA na NSSF.
Nasikitika kwamba katika hali niliyonayo ya kumwuguza mama yangu
naingizwa kwenye siasa za majitaka. Kwa sasa nitatoa maelezo kwa ufupi
ili kuondoa upotoshaji.
Kampuni ya LekaDutigite inamilikiwa na wasanii 15 ambapo kila mmoja ana
hisa 5% ambazo niliwalipia ili waweze kushirikiana katika kazi zao. Hisa
25% zilizobakia zinamilikiwa na kampuni ya Gombe Advisors ambayo ni
kampuni isiyofanya faida (Company limited by guarantee) na haina maslahi
yeyote ya kibiashara (not for profit company). Hivyo Mimi binafsi sina
maslahi yeyote ya kifedha zaidi ya kuwasaidia wasanii hawa katika kazi
zao mbalimbali.
Wasanii wa Kigoma AllStars wamefanya kazi na TANAPA na NSSF, kazi ambazo
zinajulikana na zipo. Kwa upande wa TANAPA wasanii hawa waliandaa kazi
ya kuitangaza Hifadhi ya Saadani na walilipwa. Kwa upande wa NSSF
wasanii hao walitunga wimbo na video yake (
http://m.youtube.com/watch?v=sMl8T-RkIdM ) na wimbo huo unatumika katika Shirika hilo.
Vile vile walifanya matamasha mbalimbali ya kuhamasisha watu kujiunga na
NSSF. Wasanii wa Kigoma All Stars wote ni wanachama wa Mfuko huo.
Katika kazi zote hizi Mimi binafsi sijafaidika kwa namna yeyote ile
kifedha. Kauli yeyote ya kujaribu kuonyesha kazi hizi za wasanii ni
ufisadi ni kauli za kusikitisha na kukatisha tamaa kwa mtu ambaye
anajaribu kusaidia wasanii kufaidika na kazi zao za sanaa.
Toka mwaka 2012 nilipoanza kujitokeza kusemea wasanii watu kadhaa wenye
maslahi na tasnia hii wamekuwa wakinikatisha tamaa na hata wengine kuona
nimewaingilia kazi zao.
Hivi sasa wasanii wa Kigoma AllStars ni wanahisa katika kampuni ya PERA
Africa limited ili kufaidika na biashara ya miito ya simu. Yote haya
nilifanya kwa uchungu nilionao kwa vijana wetu na sio kwa kutaka
kufaidika kifedha. Nimeumizwa sana na tuhuma hizi za kuokoteza okoteza.
Inaniumiza zaidi kutokana na ukweli kwamba ninamwuguza mama yangu mzazi,
kipindi ninachohitaji kutiwa moyo na kuombewa hata na maadui zangu
kisiasa. Kipindi ambacho mama yangu yupo mahututi, tena mjumbe wa kamati
kuu ya chama ambacho watoa tuhuma wanatoka, pole ninayopewa ndio hiyo.
Hakuna namna ya kukosa ubinaadamu zaidi ya hivi.
Najua wajibu wangu ni kusimamia Mashirika ya Umma na nikiwa mpigania
uwajibikaji nipo makini sana kuhakikisha sina mgongano wa maslahi katika
mambo yangu. Ndio maana sina biashara yeyote ile ili kuhakikisha
natimiza wajibu wangu kwa uadilifu mkubwa. Napata 'moral authority' ya
kutaka uwajibikaji kwa sababu nafanya kazi zangu kwa misingi hiyo 'at
arms length'.
Hivyo ninataka mara moja CAG afanye ukaguzi wa kazi za wasanii hao
kwenye NSSF na TANAPA. Pia achunguze kama Gombe Advisors ( company
limited by guarantee) ina maslahi yeyote ya kifedha katika kazi hizo za
wasanii. Nataka pia Shirika la NSSF na TANAPA waweke wazi mchakato wa
kazi zao na wasanii hawa kupitia LEKADUTIGITE Limited.
Zitto Kabwe
Mei 29, 2014
Dar Es Salaam.
Kambi
Rasmi ya Upinzani Bungeni jana ilimlipua mbunge kutoka kambi yao, Zitto
Kabwe ikimhusisha na ufisadi wa Sh119 milioni kutoka Shirika la Taifa
la Hifadhi ya Jamii (NSSF) na Shirika la Hifadhi za Taifa (Tanapa).
Hii ni mara ya kwanza kwa
kambi ya upinzani kumhusiaha mbunge ‘mwenzao’ na tuhuma za ufisadi
tofauti na kawaida yao ya ‘kuwashughulikia’ ubadhirifu katika Serikali.
Zitto,
mbunge wa Kigoma Kaskazini kwa tiketi ya Chadema na ambaye pia ni
mwenyekiti wa Kamati ya Bunge ya Hesabu za Serikali (PAC), anadaiwa
kuchota fedha hizo kupitia kampuni ya Leka Dutigite ambayo ina hisa
nyingi katika kampuni nyingine ya Gombe Advisors Limited ambayo Zitto ni
mkurugenzi wake.
Akiwasilisha maoni ya upinzani bungeni jana
kuhusu makadirio na matumizi ya Wizara ya Habari, Vijana, Utamaduni na
Michezo mwaka 2014/15, waziri kivuli wa wizara hiyo, Joseph Mbilinyi
alisema Zitto hakutakiwa kuchota fedha hizo kwa kuwa anabanwa na sheria
ya maadili ya viongozi wa umma.
Alisema Zitto, ambaye katika
miezi ya karibuni aliingia kwenye mgogoro na uongozi wa chama chake, ni
mwenyekiti wa PAC, kamati ambayo jukumu lake ni kushughulikia maeneo
yenye matatizo sugu ya matumizi mabaya ya fedha za umma katika wizara na
mashirika ya umma, yakiwamo Tanapa na NSSF, hivyo kulikuwa na mgongano
wa kimasilahi katika suala hilo.
Katika hotuba yake, Mbilinyi
alisema taarifa za kibenki ambazo kambi hiyo imezipata zinaonyesha kuwa
Desemba 10, 2012, Hifadhi ya Taifa ya Saadani ilihamisha Sh12 milioni
kwenda katika akaunti ya kampuni ya Leka Dutigite.
“Siku moja
baadaye fedha hizo zilitolewa kwa pesa taslimu kutoka kwenye akaunti
hiyo. Januari 14 na Februari 7, 2013 akaunti ya Leka Dutigite
iliingiziwa Sh28.6 milioni,” alisema Mbilinyi.
Sugu alisema fedha hizo ziliingizwa na mtu aitwaye Mchange na kwamba ilipofika Februari 7 zote zilikuwa zimetolewa.
Alisema
Februari 28 mwaka jana, akaunti ya Leka Dutigite iliingiziwa Sh32.3
milioni kutoka NSSF na kwamba siku hiyo hiyo fedha hizo zilitolewa
kwenye akaunti hiyo. Siku nne baadaye shirika hilo lilifanya malipo
mengine kwenye akaunti ya Leka Dutigite.
“Ziliingizwa Sh46.6
milioni ambazo zilitolewa kutoka kwenye akaunti hiyo kwa mikupuo miwili.
Katika kipindi cha miezi mitatu, kati ya Desemba 10, 2012 na Machi 4,
2013 kampuni hiyo (ya Zitto) ililipwa Sh119.9 milioni kwa utaratibu
huohuo wa ingiza-toa fasta,” alisema Mbilinyi.
Alisema kati ya fedha hizo Sh12.2 milioni zililipwa na Tanapa na Sh79 milioni zililipwa na NSSF.
Mbilinyi
alizihusisha Sh12.2 milioni za Hifadhi ya Taifa ya Saadan na maandalizi
ya filamu fupi ya kuhamamisha shughuli za utalii wa hifadhi kwa
kuwatumia wasanii kutoka mkoani Kigoma na kusisitiza kuwa wana nakala ya
mkataba huo.
Alisema ofisi ya kampuni ya Gombe Advisors zipo
jengo moja na zilipo ofisi za Kampuni ya Leka Dutigite na kusisitiza
kuwa nyaraka walizo nazo zinaonyesha kuwa Zitto na Raphael Ongangi ndiyo
wakurugenzi, huku Zitto akitajwa kuwa mchumi katika kampuni hiyo.
“Zitto
siyo mchumi kama ambavyo zinaeleza nyakara za usajili wa kampuni hiyo.
Ni mbunge na kiongozi na kwa mujibu wa sheria viongozi wanatakiwa kuwa
waadilifu, wenye huruma, utulivu na umakini,” alisema Mbilinyi.
Aliongeza:
“Kwa kadri ya ufahamu wa Kambi Rasmi ya Upinzani ya Bunge lako tukufu,
Zitto hajawahi kutangaza masilahi aliyonayo kwenye mikataba ya Gombe
Advisors na Leka Dutigite.”
Alisema Zitto kwa kampuni hizo mbili amefanya biashara na mashirika yanayosimamiwa na kamati yake na kulipwa fedha za umma.
“Kambi
Rasmi ya Upinzani inaitaka Serikali kutoa maelezo kwa kuwa suala hili
linahusu mbunge na mwenyekiti wa Kamati ya Bunge inayohusika na
usimamizi wa fedha za umma,” alisema.
Alifafanua kuwa Kamati ya
Kinga, Haki na Madaraka ya Bunge nayo ifanye uchunguzi wake juu ya madai
ya masharti ya Katiba ya Nchi, Sheria ya Haki, Kinga na Madaraka ya
Bunge na Kanuni za Bunge juu ya maadili ya kiongozi wa umma, yakiwamo
yanayohusu utangazaji wa masilahi.
Zitto ajibu mapigo
Hata
hivyo, Zitto mwenyewe alipohojiwa jana, alijibu kwa ujumbe mfupi wa
maandishi (sms) akisema amesikitishwa na kitendo cha kuingizwa katika
siasa za majitaka katika kipindi hiki akimuuguza mama yake.
“Kampuni
ya Leka Dutigile inamilikiwa na wasanii na Gombe Advisors ni kampuni
isiyofanya faida na haina masilahi yoyote ya kiabiashara,” alisema.
“Wasanii
wa Kigoma wamefanya kazi na Tanapa na NSSF kazi ambazo zipo na
zinajulikana,” alisema Zitto aliyekuwa naibu kiongozi wa kambi rasmi ya
upinzani bungeni kabla ya kuondolewa.
“Kwa namna yoyote, hii ni
ishara ya kukosa ubinadamu maana waliyoyasema wanajua sina faida yeyote
ya kifedha, leo wala kesho na Leka Dugitile na Gombe Advisors,”
alisisitiza Zitto.
Akizungumza kwa uchungu Zitto alisema “kipindi
ambacho mama yangu yupo mahututi tena mjumbe wa kamati kuu ya chama
chao, pole ninayopewa ndiyo hiyo…Hakuna namna ya kukosa ubinadamu zaidi
ya hivi”.
Zitto alisema ni vyema Mdhibiti na Mkaguzi Mkuu wa
Hesabu za Serikali (CAG) afanye ukaguzi haraka na yeye atawajibika iwapo
ataonekana kwa namna yoyote ile ana masilahi ya kifedha katika kampuni
hizo.
Tanapa yafafanua
Naye Meneja Uhusiano wa Tanapa,
Paschal Shelutete alikiri kufahamu jambo hilo na kusema: “Leka Dutigite
ilifika Hifadhi ya Saadan na kuitangaza kupitia kazi za sanaa...
sikumbuki ni lini lakini walifanya kazi na DvD zake zipo.
“Ifahamike
si Leka Dutigite pekee, tunafanya kazi na wasanii mbalimbali kutangaza
vivutio, mbuga na hifadhi zetu,” alisema Shelutete.
NSSF nayo yalonga
Meneja
Kiongozi wa Idara ya Uhusiano na Huduma kwa Wateja wa NSSF, Eunice
Chiume alisema pesa walizozitoa kwa kundi hilo zilikuwa malipo ya
kutengenezea wimbo maalumu wa shirika hilo na nyingine ni za udhamini wa
onyesho lililofanyika mwaka jana mkoani Tanga.
“Kweli mara ya
kwanza tuliwalipa Sh25 milioni wasanii wa kundi hilo ili watutengenezee
wimbo na Sh56 milioni zilikuwa za udhamini wa onyesho lao, lakini kwa
masharti ya kututangaza jambo ambalo lilikuwa na mafanikio kwetu kwani
tumefanikiwa kupata wateja wapya 30,000 kutoka sekta isiyo rasmi,”
alisema Chiume.
Alisisitiza kuwa wametumia kiwango hicho cha pesa
ili kujitangaza kwa kuwa hata mashirika ya kijamii yanapaswa kufanya
hivyo ili kuvutia wateja wengi zaidi.
